1Jo 5 | MHL | STEP | Aria mua eena Yeesus-na Krais-ke naiya nain Mua Maneka muuk teeria-ke. Ne mua eena Wiawi wiar kookaliya nain ona Muuka pun wiar kookaliya.

1 John 5

Mua Maneka Muuka opora wiar opiyen

1 Aria mua eena Yeesus-na Krais-ke naiya nain Mua Maneka muuk teeria-ke. Ne mua eena Wiawi wiar kookaliya nain ona Muuka pun wiar kookaliya. 2 I Mua Maneka kookalep opora wiar ookimik. Neeke amisarep maimik, i Mua Maneka muuk unowa wia kookalimik, naap yiam maimik. 3 Mua Maneka eena sira wuomakek nain wiar ookimik, neeke o kookalimik. Ne sira unowa yia maakek nain ookowa me yoowa akena, weetak. 4 Moram Mua Maneka muuk unowa wiar aremik nain wi miiw sira ookowa miatinimik. I Mua Maneka opora wiar opimik neeke miiw sira ookowa miatinimik. 5 Ne naareke miiw sira ookowa miatininon? Mua feenap maiya nain, “Y eesus-na Mua Maneka Muuka-ke,” mua nain-ke makena, o pepek.

6 Y eesus Krais eena miiwa orok nain maa erup fain-ke o ilenimik, eka ne aka. Me eka muutiw o ileniya, weetak. O eka-pa yasuwamik, ne oko, ona umep aka sawikak. Ewar Eliwa-ke opor makena maowa onoma, ne o Yeesus Krais maemi yia maakiya nain opor makena-ke. 7 Ne maa arow nain-ke opora kuisow nain koonowami maimik. 8 Feenap, Ewar Eliwa opora maek nain, aria o eka-pa yasuwamik nainiya, aria aka mia-pa wiar orok nain, maa arow naap epaskun wuami maimik. 9 Wi mua opora makena-ke naep maimik nain makena-ke wiar naimik. Nain Mua Maneka opora maiya nain maken akena-ke. Naapeya maa arow nain-pa ona Muuka maemi yia maakiya nain maken akena-ke, mua opora wiar nomakek. 10 Wi mua Mua Maneka Muuka opora wiar opimik nain wiena kema-pa maimik, makena, Yeesus Krais Mua Maneka Muuka-ke, naap maimik. Mua Maneka ona Muuka makena maek. Nain wi mua opora nain makena-ke me wiar naimik nain Mua Maneka wadol mua puukowimik. 11 Opor makena yia maakek nain feenap, ona Muuka anane eliwa ikowa onoma-ke. Ne muuta nain ona Muuka sesekami anane eliwa ikowa nain yia wuomak. 12 Naeya wi mua Mua Maneka Muuka kemena-pa wiar ikemik nain wi anane eliwa ikaimik. Ne wi o kemena-pa me wiar ikemik nain, weetak.

Anane eliwa ikowa

13 Ni Mua Maneka Muuka unuma makena-ke naep opora wiar opam-ikaiman. Ne i anane eliwa ikaiyen, naap amisarep maeka naep parosifa-pa maa muutitik nia maakiyem. 14 Naapeya i Mua Maneka keker opowa marew kekanep o wameiya ekimik. Neemi i ona kookalowa ookami maa nokarimik nain yia apekariya. 15 Ne makena, i maa nokaremkun yia apekariya, naap maimik. Naapeya maimik, maa mauwa nokarimik nain iiriw yia apekarep ikua, naemi ikoka makena urufiyen naimik.

16 Ne nena teeria epaskun mua-ko pina oneya urufin. Nain pina onak nain umep iiwawun mesenalowa nain me imenak. Aria no Mua Maneka fareya o asipeya anane eliwa ikowa era-pariw ikainok. Sira samo-samora onimik nain iiwawun pina manekiw. Nain me unowiya umep mesenalowa era-pa yia pikiwiya. Wi mua papako Yeesus Krais mikikira iwep mesenalikuan, naapeya yo feenap me wia maiyem, “Ni Mua Maneka wia faromaka,” naap me nia naiyem, weetak.

18 I amisaremik, i Mua Maneka muuk teeria wiar aremik nain pina me oni-ikim-ikaimik. Moram Mua Maneka Muuka ona pika yia warikap-pueya ikemik. Naeya Satan yia samorowa nain me pepek. 19 Amisarep maimik, i Mua Maneka muuk unowa wiar ikemik, nain miiw emeria mua unowa Satan tepak-pa wiar ikemik. 20 Ne fain pun amisarep maimik, Mua Maneka Muuka iiriw ekapok, ne kema yia fookak, naeya Mua Maneka maken akena amisaremik. Mua Maneka maken akena-ke, ne i o kemena-pa wiar ikemik. Ne pun ona Muuka Yeesus Krais kemena-pa wiar ikemik. Mua Maneka maken akena-ke, anane eliwa ikowa onoma os.

21 Aria yena muuk unowa, ni wi mua miira sirarep yiena inasina-ke naep sira-sira onimik nain me wiokeka.